Azpimarratzekoak

NOU-Arlo Kliniko Kardiologikoa

Azpimarratzekoak

ERIZAINTZAKO PROTOKOLOAK MIAKETA ETA PROZEDURETARAKO

  1. Azterketa hemodinamikoa / Bihotz-kateterismoa
  2. Azterketa elektrofisiologikoa / Ablazioa
  3. Kardiobertsio elektrikoa
  4. Esfortzu-proba / Esfortzu-ekokardiograma
  5. Toraxean zeharreko ekokardiograma
  6. Hestegorrian zeharreko ekokardiograma
  7. Estres farmakologikoko ekokardiograma
  8. Holter EKGa
  9. Bihotzeko erresonantzia
  10. Bihotzeko OTA
  11. Taupada-markagailua ezartzea / aldatzea
  12. Aorta-koronarioetako bypass kirurgia
  13. Balbuletako kirurgia​​​​​​

Azterketa hemodinamikoa / Bihotz-kateterismoa

Xedea: Bihotzeko egiturak eta horien funtzioa ezagutzea, arteria koronarioak barne, kateterrak erabiliz; eta diagnostikatutako patologietako batzuk tratatzea.

Funtsean, hauek ahalbidetzen ditu: 

  • Presioak erregistratzea.
  • Angiografiak (bentrikulugrafiak, koronariografiak, aortografia).
  • Bihotzeko biopsiak.
  • Tratatzea zenbait gaixotasun koronario (angioplastia, stenta etab.) eta balbuletako gaixotasun (balbuloplastia mitrala, ihes peribalbularrak ixtea), eta bihotzeko sortzetiko zenbait komunikazio ixtea.

Pazientea prestatzea

  • Azaltzea zertan datzan prozedura, nola prestatu behar den eta prozeduraren ondoren nola zaindu behar den.​​​​​​​

Gauzatzea​​​​​​​

a) Kateterismoaren bezperan

  • Pisatu eta neurtu pazientea.
  • Biloa moztu:
    • Bide femorala: biloa zabal moztu bi iztaietan, sabelaren behealdean eta izterren aurrealdean eta barnealdean

    • Bide erradiala, humerala edo brakiala: biloa moztu bi besaurre eta besoetan.​​​​​​​

b) Kateterismoaren egunean, probaren aurretik

  • Pazienteak ez du ahotik ezer solidorik hartu behar prozedura hemodinamikoa baino 4 ordu lehenagotik, gutxienez, eta ez du ahotik likidorik hartu behar 2 ordu lehenagotik.  Arau orokor gisa, kateterismoa lehenengo eta bigarren eginen zaien pazienteak baraurik egonen dira; hirugarrenak eta laugarrenak likidoak hartzen ahal dituzte, eta bosgarrenak gosaria hartzen ahal du.

  • Egin pazientearen garbitasuna (bainua edo dutxa).

  • Kendu azazkal esmaltea. Pazienteak aldean eramaten ahal ditu betaurrekoak, audifonoak eta erlojua.

  • Pazientea telemetria sistemarekin monitorizaturik badago, kendu iezaiozu, eta monitorizazioa aldi baterako eten dela jakinarazi Unitate Koronarioan edo zentrala dagoen tokian.

  • Bidali pazientea Hemodinamika gelara ohean, ospitaleko kamisoia jantzita, azpiko arroparik gabe. Ahaideren bati gogorarazi komeni dela gelan itxarotea, edo jakinaraz dezala harremanetarako bidea.​​​​​​​

c) Kateterismo ondoko zainketak

  • Zainketa orokorrak:
    • Zaindu ea hematomaren zeinu edo sintomarik dagoen ziztadaren zonan.
    • Zaindu lehenbiziko mikzioa eta neurtu guztizko diuresia.
  • Eman dieta mastekatzen erraza, digeritzen erraza eta flatulentziarik sortzen ez duena, eta gehitu ura (1,5 litro), kontraindikaziorik ez badago.
  • Zainketak aplikatu ziztadaren zonan:
    • Zaindu ziztadaren zonako apositua, ea odolik dagoen.
    • Zaindu ziztadaren zona, hematoma lokalik ez dagoela egiaztatzeko.
  • Utzi apositu hertsatzailea biharamunera arte betiere.
  • Erabilitako teknikari dagozkion zainketa zehatzak aplikatu behar dituzu:
  • Arteriaren josturarekin
    • Erabateko atsedena 6 orduz. Oheburua jaso (< 30º)
    • Ziztatutako hanka tolestu gabe eduki.
  • Josturarik gabe
    • Eduki Femostop® sistemarekin hertsatuta 2 orduz, gorputz-adarreko perfusioa egiaztatuz.
    • Pazienteak ohean atsedenean egon behar du hurrengo egunera arte, oheburua 30º baino gutxiago altxatuta, eta ziztatutako hanka tolestu gabe.
  • Zain barneko sargailuarekin
    • Pazienteak ohean atsedenean egon behar du, oheburua 30º baino gutxiago altxatuta, eta ziztatutako hanka tolestu gabe.
    • 6 orduren buruan, kendu zain barneko sargailua eta eduki pazientea atsedenean beste 3 orduz.
  • Arteria barneko sargailuarekin
    • Pazienteak ohean atsedenean egon behar du, oheburua 30º baino gutxiago altxatuta, eta ziztatutako hanka tolestu gabe.
    • 6 orduren buruan, arteria barneko sargailua kenduko da eta pazientea atsedenean egonen da hurrengo egunera arte.
  • Arteria eta zain barneko sargailuekin
    • Kendu lehendabizi arteria barneko sargailua, aurreko puntuan azaldu den bezala, eta 15 minutu geroago zain barnekoa.
  • Ziztada arteria brakialean izan bada
    • Atxiki 6 orduz immobilizazio ferula, eta esan pazienteari atseden erlatiboan egon behar duela 2 orduz (agontzen ahal da).
  • Ziztada arteria erradialean izan bada
    • Esan pazienteari atseden erlatiboan egon behar duela 2 orduz (agontzen ahal da).
    • Kendu eskumuturreko pneumatikoa, protokoloaren arabera.​​​​​​​

AZTERKETA ELEKTROFISIOLOGIKOA (AEF) / ABLAZIOA

Azterketa elektrofisiologikoa: prozedura inbaditzailea da, eta haren bidez bihotzeko eroapen sistema elektriko espezifikoaren egoeraren ebaluazioa egin daiteke. Arritmien diagnostikoa, mota eta larritasuna zehazten ditu, eta non sortu diren eta zer nahasmendu eragiten dituzten.

Barrunbe barneko erregistroak lortu eta bihotzeko atalak elektrikoki estimulatu ahal izateko, kateter batzuk bihotzeko egiturak ukitzen jarri behar dira. Odol-hodi zentraletan zehar sartzen dira, kontrol erradiologikoaren pean.

Ablazioa: ablazioaren bidez modu mugatu eta kontrolatuan suntsitzen dira bihotzeko ehunaren zati batzuk, takikardiak hasten edo/eta mantentzen diren zatiak. Energia iturri batekin lotutako kateter bat arteria edo zain barnetik sartzen da bihotzeko barrunbeetaraino. Prozesua sedazio leunarekin egin ohi da, eta 2-6 ordu bitarte irauten du, ablazio zonaren kokapenaren eta hura mapatzeko zailtasunaren arabera.

Pazientea prestatzea

  • Prozeduraren gaineko informazioa eman pazienteari.
  • Erantsi historia klinikoa eta baimen informatua, honako hauek bilduta:
    • Bizi-zeinuen erregistroa (tentsio arteriala, bihotz-maiztasuna, tenperatura).
    • EKGa.
    • Rx torazikoa, abdominopelbikoa eta lunbarra
    • Analitika (hemograma osoa, koagulazioa, ionograma, glukosa, urea eta kreatinina).
  • Biloa moztu:
    • AEFa eta ablazio sinplea: bularraldean eta gerriaren ezkerraldean.
    • Takikardia bentrikularra eta fibrilazio aurikularra: bularraldean, sabelaldean eta izterren aurrealdean. Bizkarrean ere bai, ipurmasailetaraino.
  • Bainua edo dutxa.
  • Baraurik.
  • Kendu hortz protesia, azkazal esmaltea eta gauza pertsonalak.

Prozedura ondoko zainketak

  • Zaindu pazientearen egoera orokorra.
  • Bizi-zeinuen erregistroa (tentsio arteriala, bihotz-maitasuna, tenperatura).
  • Egin ablazio ondoko EKGa.
  • Zaindu ea ziztada puntuetan odolik dagoen eta hematomarik agertzen den.
  • Dieta:
    • AEFa eta ablazio sinplea: kontraindikaziorik ezean, dieta arautua.
    • Takikardia bentrikularra eta fibrilazio aurikularra: oro har, dieta absolutua ebakuntza ondoko 4-6 orduetan (dieta erizaintzako grafikoan erregistratu behar da)
    • Ohearen posizioa < 30º eta pazientea ahoz gora etzanda. Sargailuak kendu bazaizkio, alboz etzanda egon daiteke, eta alboz aldatzeko mobilizazioa blokean eginen da. Atsedena ohean:
    • Zaineko ziztadaren ondoren, 4-6 ordu.
    • Arteriako ziztadaren ondoren, protokoloaren arabera.

ESFORTZU-PROBA / ESFORTZU-EKOKARDIOGRAMA

Xedeak:

  • Gaitasun funtzionala baloratzea.
  • Miokardioko iskemia identifikatzea.
  • Arritmiak edo/eta eroapenaren nahasmenduak identifikatzea.

Pazientea prestatzea

  • Prozeduraren gaineko informazioa eman pazienteari.
  • Ez du baraurik egon beharrik.
  • Ez du asko jan behar proba aurreko bi orduetan.
  • Arropa erosoa jantzi behar du. Oinetako itxiak (txapinak) eta prakak edo galtzontzilloak.
  • Baimen informatua, sinatuta
  • Egiaztatu ez dela angina-krisirik izan azken 24 orduetan.

Prozedura ondoko zainketak

  • Zaindu egoera orokorra.
  • Jaten ahal du, kontraindikaziorik ez badago.​​​​​​​

TORAXEAN ZEHARREKO EKOKARDIOGRAMA

Xedea: bihotzeko egituren eta barrunbeen azterketa anatomiko eta funtzionala.

Pazientea prestatzea

  • Prozeduraren gaineko informazioa eman pazienteari.
  • Ez du prestaketa fisikorik behar.

HESTEGORRIAN ZEHARREKO EKOKARDIOGRAMA

Xedea: Bihotzeko egituren eta barrunbeen azterketa anatomiko eta funtzionala.

Bihotzeko egiturak ikusteko, ultrasoinu-transduktore bat ezarrita daukan zunda sartzen da pazientearen hestegorritik.

Pazientea prestatzea

  • Prozeduraren gaineko informazioa eman pazienteari.
  • Erantsi grafikoa eta baimen informatua.
  • Erabat baraurik.

Prozedura ondoko zainketak

  • Zaindu egoera orokorra.
  • Ez du ahotik ezer hartu behar 2 ordu igaro arte (ahoko eta laringeko anestesia efektuagatik).